انت انسان انانى.....

السلام عليكم ورحمة الله وبركاته
‏
يمكن عنوان الموضوع يكون غريب شوية بس انا اسفة ده رأيى فى المدخن..... ايووووون الانسان المدخن انسان انانى عارفين ليه؟ قولتولى ليه اقولكم انا عشان

- لما واحد يعرف ان له اخ مسلم محتاج وبدل ما يساعده ياخد المال اللى كان حيساعده بيه ويحرقه يبقى انانى

- لما واحد يعرف انه بتدخينه اللى ممكن يرضى مزاجه شويه بيضر صحته الهبه التى وهبها الله له يبقى انانى

- لما واحد يعرف انه بتدخينه بيضر صحة اللى حواليه وهما مش لهم ذنب الا انهم متواجدين معاه فى نفس المكان ومش يهمه يبقى انانى

-لما واحد يعرف يفكر يرتبط بواحدة ومش مهم ان يملى البيت دخان ويبوظ لها صحتها يبقى انانى

-لما واحد يعرف يفكر انه ممكن يكون اسرة و يضحى بصحة اطفاله علشان سيجارة يبقى انانى

وكل دة علشان هوه عايز كده وعايز يدخن ويرضى نفسه ومزاجه
‏
‏
وانتو ياترى ايه رأيكم فالانسان المدخن؟؟؟؟؟
هستنى آرائكم

تلاقى بكلمته دى خلى معظم الفصل يدخن عشان يعاندو الاستاذ هههههههههههه
نورتنى ياسحس

والله كنا ف مدرسة الشهيد العيال كانت بتشرب ف المدرسة مدرسة الشهيد اللى كانت مدرسة الرجالة


يا شيخة دلواتى عيال صغيرة بتشرب سجاير قله ادب فعلا

ما انا بشرب الزفت السجاير

و الحمد لله صحتى زى البومب

ولما بدخن مش بأذى حد غير محمد عادل ههههههههههههههههههههههههههههههههههههههههههه

يا مان فى الشهيد فتحىولا الشهيد مين
انا كنت فى الشهيد فتحى وكنت بدخن عادى يعنى الى محتاج نساعدة بس التدخين مش انانية

طيب انا كنت بدخن وقتها مكنتش بقول لحد دخن زى عشان مايبقاش ذنبى وذنبه عليا
وانتوا يا جماعة ان كنتوا مش هتبطلوا التدخين متأثروش على البقية
وفعلا موضوع جامد يا بسمة

يامعتصم ده رأيى وقلت مبرراتى ومعتقدش كلامى مش مقنع التدخين فعلا انانية.
وياريت زى ماقال احمد لومش هتبطل متأثرش عالناس اللى عاوزة تبطل ومتساعدش حد على التدخين.
نورتونى ياجماعة

اه انا عارفة حكاية ان الرجولة بالسجاير عند العيال بجد ربنا يهديهم
نورتنى ياميدو

ماشاء الله عليكم ربنا يحفظكم يارب بس بص ياحازم لوعلى الفلوس توصل ازاى فى مليون طريقة توصلهم بيها بس احنا اللى بنتلكك ولوفضلنا كده مش هنعمل حاجة ابدا وعلى فكرة انت بالذات مش المفروض تقول كده. صح ولا ايه؟
نورتنى بمرورك وردك الجميل وربنا يحفظك انت واصحابك

بصراحة انا شايف انى الموضوع ملهوش لازمة اللى يشرب يشرب كده كده هيضر نفسه واللى مشيربش ميشربش هو كده بينفع نفسه يعنى الموضوع منتهى اللى بيشرب حتى لو قرأ الموضوع ده مش هيبطل

بالبلدى كده موضوع زى قلته

ميرسى على رأيك فالموضوع بس انا شايفة انه مش بعيد على ربنا انه يخلى موضوع زى ده سبب من الاسباب اللى تخلى واحد يبطل يدخن ولا انت شايف انه بعيد على ربنا؟؟ وبعدين اللى بيدخن مش بيضر نفسه بس ده بيضر كل اللى حواليه ياجولد. وشايفة كمان ان انا احسن من ناس كتير حاطة ايديها على خدها مش بتحاول تعمل اى حاجة على الاقل لما ربنا يسألنى هقوله انا حاولت انى اغير المنكر بلسانى عشان مكنش ب ايدى اغيره ومكتفتش انى اغيره بقلبى بس عشان ده اضعف الايمان.
ميرسى مرة تانية على مرورك وردك الجميل وربنا يهدى الجميع ان شاء الله

معلش على ردى اللى ضايقك و اعتبرينى مكتبتش حاجة

bobs_ho كتب:وعلى فكرة انت بالذات مش المفروض تقول كده. صح ولا ايه؟

انا مش بقصد عشرة ولا عشرين ولا الف جنية انا اقصد الملايين ذي المساعدات لغزة ازاي توصل وناس كتيرة في مصر جاهلة ومتعرفش ازاي توصل الفلوس دي والناس اللي فاهمة بتكون خايفة للفلوس دي توصل لناس متستحقهاش انا بقصد الية لجمع التبرعات والصدقات والزكاة دي بترجع لايمان الواحد
هوه ده قصدي يا بسمة