النسوان اتهبلت ولا ايه يوميات احمد كمال او مجرد انسان

من طرف مجرد انسان الخميس فبراير 19, 2009 10:34 pm

المكان: على الكورنيش

الزمان: امبارح بلييل

الحدث : انا وصاحبي ( حسين) بنتمشى وموبايله رن وكان مسج

زروة الحدث: بعد ما قرا المسج لقيته بيقول النسوان اتهبلت ولا ايه؟!

ودار الحوار بيني وبينه

- ايه بتقول ايه؟!

* لا مفيش يا احمد

-مفيش ازاي يا ( حسين) انته لسه قايل النسوان اتهبلت ولا ايه....ايه يابني انته لسعت ولا ايه

*خلاص بقى ياحمد انسى الموضوع

- (بمنتهى الحشرية) لا مش هنسى يا ( حسين) قول في ايه؟

*الحوار كله يا سيدي اني كنت اعرف واحده....

-(بمنتهى الغلاسه وانا رافع حواجي 88)

آآآآه عااااارف واااحده...ماشي يا سيدي ربنا يسهلوووو يا سيدي
*لا والله ياحمد مش زي ما انت فاهم

-ماشي يا سيدي كمل

*المهم انه من حوالي شهر لقيت امها ........

-(قاطعته بمنتهى الغلاسه والسخرية) العب .....هوا الحوار فيه امها كمان

* اه

-(بمنتهى الدهشه) ازاي احكيلي؟

* منته يا زفت (قصده عليا) لو خرست شوية هحكيلك واكمل افصل بقى

-ماشي يا سيدي اديني مش هنطق بس انته كمل

*مفيش يا سيدي امها بتكلمني ع الموبايل كل 3 ايام تقريبا
- كمان الموبايل.........وامها عرفت نمرتك منيين

* وحياه امك لو مسكتش لهسيبك وامشي

- خلاص خلاص والله ....اديني سكت خالص
* نمرتي عرفتها مني لما قابلتها

طبعا كنت هموت واعرف قابلها ازاي بس مرضتش اتكلم

وتقريبا هوا حس بيا فحلقني وكمل قبل ما انطق

* عادي يعني ياحمد كانت عزومه غدا وطلبت نمرتي

* المهم بقالها فتره بتكلمني وكانت كويسه جدا معايا الاول كانت بتقولي اخبارك ايه يا بني...ولو عاوز اي حاجه انا في مقام ماما...وبعدين اللهجه اتغيرت وبقت ايه محدش بيشوفك ولا بتكلم ( حسين) بنتها الايام ده ليه اوعى تكون مزعلاك..وبعدها بفتره بقت طريقه الكلام بقت ...لالالالا مهو كده مينفعش احنا اه واثقين في اخلاقك بس كلام الناس وحش وانته بردو ليك اخوات بنات.............

وهنا يا احمد مقدرتش امسك نفسي...

- (انا بقى ومضايق منه جدا) بص يا فلان انا فاهم اللي عاوز تقوله بس متقنعنيش انك مكنتش بتلمح باي ارتباط او تكون وعدت البونيه بحاجه سواء بطريقه مباشرة او غير مباشره .

* (لقيت مناخيره كبرت) ورد عليا بمنتهى العصبيه ياشيخ الاهي لو كنت عشمتها بحاجه سواء هيا او امها من قريب او بعيد يبقى اعدمك انته وهيا وامها في يوم واحد....مبسوط كده

- (بعد ما ضحكت من قلبي بجد لاني حسيت انه شوية وممكن يرميني في النيل) ايوة مبسوط كمل انته

* مفيش ياحمد ساعتها لقيت اني مش قادر احرجام البت وخصوصا ان البت عارفه انها مجرد زميله...وبس يا سيدي لقتها بعتالي مسج بتقولي فيه انته واطي اوي....

STOP

-------------------------

هوا في ايه بجد

الناس بتعمل ليه كده في بناتها

هوا ليه في امهات بالرغم انهم مثقفين ومتعلمين جدا بيدللوا على بناتهم بالرغم انهم :-

ان بناتهم بيكونوا

*كويسيين جدا.

*جمال جدا.

*صغيرين جدا.

------------------

اه صحييح نسيت اقولكم باقي الموضوع

صاحبي ( حسين) لما خلص كلامه وحكايته قالي ايه رايك

قلتله لو عاوز رايي بصراحه فموقف زي ده مش هينفع ارد عليه غير بكلمه واحده من 3 حروف

...

فكك وتعالا نجيب عيش فينو