هام جدا الهلال و الصليب من معتقدات مجرد انسان

من طرف مجرد انسان الجمعة فبراير 20, 2009 8:25 pm

من كتر ما بتكلم في الموضوع ده في الواقع زهقت , عشان كده دي هتكون آخر مره هتكلم فيه !

ايه اللي خلاني اتكلم في الموضوع ده ؟

1 - لما ابقى واقف و الاقي واحد غبي جه قالي على فكره اللي انت واقف جنبه ده مسيحي.

2 - لما الاقي واحد بيقول على المسيحي المتدين انه “كفتس”.

3 - لما الحرامي يسرق محلات المسيحي و يسيب محلات المسلم على أساس ان المسيحي حلال فيه كده , ( حرامي عنده مبدأ واخد بالك انت ).

4 - لما المسيحي يشرب ميه في رمضان قدامنا و احنا صايمين و الاقي واحد مسلم بيشتم فيه و في اللي جابوه.

5 - لما يجي شوية متخلفين و مأجورين زي أقباط المهجر و يقولوا ان المسلمين بيضطهدوا الأقباط.

6 - لما تشهد على المسيحي انه إنسان محترم و بيعاملك بمنتهى الذوق و الأخلاق فيجي واحد غبي و يقولك ” يا عم ده بيعمل كده عشان تقول عليه كده “.

7 - لما يجي حد يقولي حرام تهني المسيحي بعيده.

8 - لما الاقي واحد متخلف مش بيرضى يكلم المسيحي لمجرد انه مسيحي و فاكر ان هو ده مبدأ الولاء و البراء اللي موجود عندنا في الإسلام.

و هقول كل حاجه واحده واحده . .

(1)

ممكن أفهم يعني ايه اللي هستفاده لما سعادتك تيجي تقولي ان اللي واقف جنبي مسيحي ؟ , هو المسيحي ده بينقل الأمراض ولا ايه ؟ , هو مثلاً لو لمسته وانا واقف هيجيلي جرب ؟ ولا مثلاً هبقى شبه الصليب البلاستيك ؟ , انا معرفش ايه التخلف اللي بيبقى عند العقليات المعاقة دي , بس تقريباً هو عيب في التربية .

(2)

اولاً بالنسبة للجاهل للي بيقول على المسيحي “كفتس” عشان تبقى عارف يعني ايه “كفتس” الكلمة دي جيه من كلمة copts اللي معناها أقباط , يعني لا تعني اي شيئ غريب لما تشير بيها للمسيحي .

(3)

ده بقى حرامي ابن كلب , من الآخر , و اللي بيعمله ده مش من الهوا , ده نابع من معتقدات متخلفة تجاه المسيحي , هو مثلاً لم يجي يتحاسب هيتقاله انت سرقت 20 محل منهم 10 بتوع مسلمين و 10 بتوع مسيحيين بس مادام هم مسيحيين هيتعملك خصم 50 % ؟

(4)

وانا في الكلية في رمضان كان بيجي واحد و يشرب ميه لإن الجو كان حر , و مكانش يقصد يشرب قدامنا , كان في ناس جنبي فضلت تسب و تلعن , معرفش ليه يعني , هو احنا مكتوب علينا نصوم و نجبر كمان اللي مش مسلمين يصوموا معانا ؟ , اللي سب و لعن بوظ صيامه و ارتكب سيئات , و على فكره المسيحي مع انه كان ممكن يحترم مشاعر الآخرين الا اني مقدرش الومه انه بيشرب , الجو حر و هو مش مجبر انه يفضل عطشان .

(5)

طبعاً مش محتاج اقعد اعيد و ازيد فيها , معروف ان دول ماشين تبع اجندة سياسية , أقباط المهجر دول ولا يفرقوا مع الشعب الأمريكي في حاجه ولا حتى أقباط مصر يفرقوا مع الشعب الامريكي ولا الحكومة الأمريكية , و مع ذلك جايين و مصرين يعملوا فتنة و يقولوا في إضطهاد للمسيحيين في مصر عشان يحققوا أهداف سياسية , إن كان في إضهاد فهو من قلة متخلفة و على فكرة القلة دي هتفضل موجودة غصب عن أي حد لإن التخلف هيفضل موجود .

(6)

المسيحي عارف انه لو وقف على راسه و رجله في الهوا انا مش هبقى مسيحي ابداً زي ما هو عمره ما هيبقى مسلم بسهولة , يبقى ايه لازمة افتراض سوء النية ؟ , المسيحي لما بيعاملني كويس بيبقى بيعمل كده لإنه إنسان محترم و مؤمن بأن الأخلاق واجبه مش عشان يتقال عليه انه كويس و على فكره في مصر أغلبية المصريين بيتعاملوا مع بعض بدون تمييز ديني , و دي حاجه حلوة .

(7)

انا ههنيه و هجيبله هدية كمان , و لو طلب مني اروح احضر معاه مناسبه هروح .

(

ده بقى مش بني آدم اساساً وواضح انه جي من ورا البقرة , ولاء ايه و براء ايه يا ريس ؟ , هو انت بتفهم منين ؟ , انا اعرف ان الإنسان الطبيعي بيفهم من دماغه ؟ , انت عندك مكان تاني ؟ , الولاء و البراء حاجه و القرف اللي انت بتعمله ده حاجه تانيه خالص , ده سيدنا محمد كان بيزور جاره اليهودي , جي انت تخترع مبدأ جديد سيادتك و تقول انه مفروض انك تتعامل بقرف مع المسيحي , معلش يعني روح قول لأبوك “يا بابا انت معرفتش تربيني صح” .

مصر للمصريين مسلمين و مسيحيين غصب عن أي حد هيحاول يعمل تفرقة !

بالمناسبة في واحد متخلف بعتلي مسج بيطلب اني اشيل الصليب اللي في علامة الهلال مع الصليب اللي موجوده في المدونة على الشمال و الا هيخترق الموقع , فكرني باللي اخترق موقع حزب الوفد و طلب انهم يشيلوا الصليب برده من الشعار , نفس التخلف , تقريباً ولاد عم هم الإتنين .

رسالة لمرسل رسالة التهديد : طظ فيك وفي اللي جابتك , لو عايز تشيل الصليب تعالى شيله بنفسك بس حاسب عشان تقيل و ممكن تتعور , سلملي على ماما و بابا بقى .

على فكرة انا مش مقتنع بالصليب كرمز لإني كمسلم مؤمن بإن المسيح متصلبش و إيماني برمز الهلال و الصليب نابع من إقتناعي بمغزاه (الوحدة الوطنية) مش بمجرد رمزيته .

من طرف حازم الأقصر الجمعة فبراير 20, 2009 8:39 pm

شكرا علي موضوعك يا فنان وكلامك كلوا انا مؤمن بيه

والحمد لله احنا عندينا في الاقصر لا في فرق بين مسلم ومسيحي الا الدين فقط وبخصوص الوحده الوطنية في مصر حنقول الحمد لله والحمد لله والحمد لله

شكرا علي موضوعك مرة تانية يا ابوحميد

من طرف مجرد انسان الجمعة فبراير 20, 2009 8:47 pm

شكرا يا حازم الأقصر على مرورك

هام جدا الهلال و الصليب من معتقدات مجرد انسان

هام جدا الهلال و الصليب من معتقدات مجرد انسان

رد: هام جدا الهلال و الصليب من معتقدات مجرد انسان

رد: هام جدا الهلال و الصليب من معتقدات مجرد انسان