ملكش دعوة بيا يا عم انا عجباني دماغي كده

محدش ليه دعوة باللي احنا بنعمله طالما مش بنضر حد

انا حر و انت حر و انتي حره
واللي عايز يجبرنا على اننا نعمل حاجه غير اللي احنا بنحبها و عايزنها يروح يشوف العيوب اللي فيه الاول ويصلحها

انا حر و انت حر و انتي حره
هي عايزة تبقى محجبه و عاجبها نفسها كده محدش ليه دعوة
والتانيه مش محجبه و شايفه ان ده اللي صح محدش ليه دعوه

هو بيلبس لبس غريب و مأفور هو عاجبه نفسه كده
والتاني بيلبس تقليدي و ملوش دعوة بالموضة وهو عاجبه نفسه كده

كل واحد مسئول عن نفسه و محدش ليه حق انه يعتدي على حرية حد طالما ان حريته مضرتكش في حاجه
ومحدش يمثل ويعمل فيها رجل دين و تقول حرام و حلال مفيش حد ليه دعوة بعلاقة الواحد بربه انت من حقك تقول اللي انت شايفه صح واللي شايفه غلط وانا من حقي ارفض او اقبل انت
مش من حقك تجبرني على حاجه

كبت الحريات في مجتمعنا بقت رايه بيسلمها كل جيل للي بعده و ده اللي مودينا في داهيه ونلاقي نفسنا بنعمل اللي بيعجب الناس قدامهم و من وراهم نعمل اللي احنا عايزينه

غلط غلط غلط
ملكش دعوة بيا يا عم انا عجباني دماغي كده و مستحيل مستحيل من خمستاشر المستحيلات ان حد يتغير من غير ما يكون هو عايز يتغير من جواه و مقتنع بالتغير ده بجد

واحده بتقولي انا مش عارفه الناس مالها و مال لبسي انا عاجبني شكلي كده انا حره و محدش ليه حق ان يتحكم فيا (تمااااااااام)
لكن بعد شويه جت سيرة بنت بتيجي الجامعه بميك اب كامل فقالتلي انا مش عارفه هي ازاي بتيجي الجامعه كده شكلها اوفر اوي مينفعش كده
تناقض مجتمعنا..يا بنت الناس طالما انتي حره و محدش ليه دعوة بشكلك هي كمان حره و محدش ليه دعوة بشكلها ولا انتي بس اللي ليكي حق تعملي اللي انتي عايزاه و هي لأ

انت يا اللي بتكبت حريتنا ملكش دعوة بينا
وانتي يا اللي عايزة تجبرينا على اللي انتي عايزاه ملكيش دعوة بينا
ربنا ادى كل واحد فينا عقل يفكر بيه و محدش عينك مكان عقلنا لأ احنا بنفكر كويس عندك وجهة نظر قولها لكن متجبرناش عليها
وملكش حاجه عندنا طالما مش هانضرك واحنا ملناش حاجه عندك طالما مش هاتضرنا فانت حر مالم تضر