الريس حسني مبارك

من حسني مبارك .. إلى شعب مصر

ياشعبي حبيبي، ياروحي يابيبي، ياحاطَّكْ في جيبي، يابن الحلال
ياشعبي ياشاطر، ياجابر خواطر، ياساكن مقابر، وصابر وعال
ياواكل سمومك، يابايع هدومك، ياحامل همومك، وشايل جبال
ياشعبي اللي نايم، وسارح وهايم، وفي الفقر عايم، وحاله ده حال
أحبك محشش مفرفش مطنش، ودايخ مدروخ، وآخر انسطال
أحبك مكبر دماغك، مخدَّر ممشي أمورك، كده باتكال
وأحب اللي ينصب، وأحب اللي يكدب، وأحب اللي ينهب، ويسرق تلال
وأحب اللي شايف، وعارف وخايف، وبالع لسانه، وكاتم ماقال
وأحب اللي قافل، عيونه المغفل، وأحب البهايم، وأحب البغال
وأحب اللي راضي، وأحب اللي فاضي، وأحب اللي عايز يربي العيال
وأحب اللي يائس، وأحب اللي بائس، وأحب اللي محبط، وشايف محال
وأحبك تسافر، وتبعد تهاجر، وتبعت فلوسك، دولار أو ريال
وأحبك تطبل، تهلل تهبل، عشان مطش كوره وفيلم ومقال
وأحبك تأيد، تعضض تمجد، توافق تنافق، وتلحس نعال
تحضر نشادر، تجمع كوادر، تلمع تقمع، تظبط مجال
لكن لو تفكر، تخطط تقرر، تشغِّلي مخك، وتفتح جدال
وتبدأ تشاكل، وتعمل مشاكل، وتنكش مسائل، وتسأل سؤال
وعايز تنور، وعايز تطور، وتعمللي روحك مفرد رجال
ساعتها حجيبك، لايمكن أسيبك، وراح تبقى عِبره، وتصبح مثال
حبهدل جنابك، وأذل اللي جابك، وحيكون عذابك، ده فوق الاحتمال
وأمرمط سعادتك، وأهزئ سيادتك، وأخلّي كرامتك في حالة هزال
وتلبس قضية، وتصبح رزية، وباقي حياتك تعيش في انعزال
حتقبل ححبك، حترفض حلبك،
حتطلع حتنزل، حجيبلك جمااااال!

يا جماعه لو سمحتم مش هتكلم تانى محدش يغلط فى البلد ولا الحاكمين

ليس من حق أي شخص مهما كان أن يرتجل دستور لأي شخص أخر فكيف لنا أن نرتجل دستور لأحدا رؤساء البلاد وأرجوا من الجميع الفهم الجيد الصحيح لمعني الديموقراطية والحرية الفكرية

والله يا جماعة انا شايف ان كلام الراجل ده 100100 بس المشكلة مش فى الريس المشكلة فى الشعب والله اعلم