مواقف محرجة جدا جدا

1_انك تكون ماشي وواثق من نفسك وتقوم واقع على الأرض فجأة

الموقف ده انا شفته بعينى وحصل لبنت , شفته مرتين , مره فى الشارع وانا ماشى وكان فى بنت ماشيه فى الشارع وفجاه وهى ماشيه لوحدها راحت واقعه لوحدها , بس بصراحه البنت بقت فى نص هدومها من الكسوف , وربنا سترها معاها ان مكنشى حد غيرى انا فى الشارع وست عجوزه بس , انا بصراحه كنت عاوز اضحك لكن انا راعيت شعور البنت وصعبت عليا ومسكت نفسى .


الموقف التانى حصل قدامى وانا قاعد عند قاعه مبارك فى الجامعه , كان فى بنت لابسه بنطلون طويل ورجله واسعه قوى من تحت والبنت كانت لابسه جزمه كعب عالى , وفجأه وهى ماشيه جت قدام القاعه ووقعت لوحدها , بس هى غالبا اتشنكلت فى بنطولنها الطويل وجزمتها الكعب العالى , لكن فى الموقف المنيل ده كان فى ناس كتيييييييييير عند القاعه , والبنت يا عينى مش عارف اقولكوا شكلها كان ايه , المهم هى قامت ومشيت وهى وشها فى الارض . بس بجد صعبت عليا , لانها بنت , بعكس الموقف ده لو كان حصل لولد .